पहिरोमा पुरिएर एक जनाको मृत्यु  

१४-साउन       
पोखरा।कास्कीको माछापुच्छ्रे गाउँपालिका–३ घाचोकमा पहिरोमा पुरिएर एक जनाको मृत्यु भएको छ । 

पहिरोमा पुरिएर पोखरा महानगरपालिका–२५ का २३ वर्षीय तेजबहादुर गुरुङको घटनास्थलमै मृत्यु भएको जिल्ला प्रहरी कार्यालय कास्कीका सूचना अधिकारी एवं प्रहरी नायब उपरीक्षक हरिबहादुर बस्नेतले जानकारी दिनु भयो ।

पहिरोमा शिक्षक सुरज मोहन पोखरेल घाइते हुनु भएको छ । उहाँको मणिपाल अस्पतालमा उपचार हुदैँछ । घाचोकको लस्तीखोलास्थित हेमजा– माछापुच्छ्रे सडक खण्डमा विहान पहिरो खसेको थियो ।

पहिरो पन्छाउने क्रममा गुरुङको शव फेला परेको हो । बंगुर फार्ममा दाना लिएर जाने क्रममा गुरुङ पहिरोमा पुरिएको प्रहरीले जनाएको छ ।

घटनामा परी घाचोककै शुक्ला गण्डकी माध्यमिक विद्यालयका सहायक प्रधानाध्यापक सुरजमोहन पोखरेल घाइते हुनु भएको छ । पोखराबाट विद्यालय जाने क्रममा शिक्षक पोखरेल सवार मोटरसाइकलाई पहिरोले पुरेको थियो । घटनामा घाइते शिक्षक पोखरेललाई स्थानीयले उद्धार गरी अस्पताल लगेका थिए ।