लक्ष्मी आधारभूत विद्यालयका विपन्न विद्यार्थीलाई शैक्षिक सामग्री वितरण
अर्थपूर्ण न्युज
साउन–२,२०८२
गुल्मी।
प्रतिमा भट्टराई।
गुल्मीको रुरुक्षेत्र गाउँपालिका ५ स्थित लक्ष्मी आधारभूत विद्यालयमा एक विशेष कार्यक्रमका बीच अति विपन्न वर्गका विद्यार्थीलाई शैक्षिक सामग्री, पोशाक, झोला लगायतका सामग्री वितरण गरिएको छ।
कार्यक्रम रुरु कृषि परियोजनाको आयोजनामा तथा रुरुक्षेत्र गाउँपालिकाको समन्वयमा हिजो सम्पन्न भएको हो। विद्यालयका प्रधानाध्यापक मनकला भण्डारीका अनुसार उक्त विद्यालयमा अध्ययनरत विद्यार्थीमध्ये ९० प्रतिशत बोटे, माझी तथा अन्य विपन्न वर्गका हुन्।
वितरण कार्यक्रमका प्रमुख अतिथि गाउँपालिकाका अध्यक्ष यदु ज्ञवाली रहनुभएको थियो भने वडा अध्यक्ष हरिप्रसाद ज्ञवालीको अध्यक्षतामा कार्यक्रम सञ्चालन गरिएको थियो। कार्यक्रममा रुरु कृषि परियोजनाका पदाधिकारीहरू, जनप्रतिनिधिहरू तथा शिक्षा प्रेमी महानुभावहरूको उल्लेख्य उपस्थिति रहेको थियो।
कार्यक्रमलाई सम्बोधन गर्दै अध्यक्ष ज्ञवालीले विपन्न वर्गका विद्यार्थीहरूका लागि आवश्यक पर्ने शैक्षिक सामग्री पालिका तथा परियोजनाको समन्वयमा उपलब्ध गराउने प्रतिबद्धता व्यक्त गर्नुभयो। उहाँले विद्यालयको नतिजा सुधार भएको देख्दा खुसी लागेको भन्दै आगामी दिनमा अझ बढी सहयोग गरिने स्पष्ट पार्नुभयो।
वडा अध्यक्ष ज्ञवालीले विद्यालय वरिपरि बोटे, माझी लगायत विपन्न समुदायको बस्ती रहेकोले शैक्षिक गुणस्तर वृद्धिमा कुनै कमी नहुनेगरी व्यक्तिगत तथा वडास्तरबाट निरन्तर सहयोग गरिने विश्वास व्यक्त गर्नुभयो।
