विद्यालयद्वारा वृक्षारोपण तथा प्रथम त्रैमासिक परीक्षाको नतिजा प्रकाशन

चुरामणी तिमिल्सिना    
साउन–७,२०८२  
गुल्मी।गुल्मीको चन्द्रकोट गाउँपालिका–७ रुपाकोटस्थित रामकोट आधारभूत विद्यालयले एक कार्यक्रमका विच  वृक्षारोपण र प्रथम त्रैमासिक परिक्षाको  नतिजा प्रकाशन गरेको छ।विद्यालयका शिक्षक,विद्यार्थी तथा अभिभावकको सहभागितामा विद्यालयले आज सो कार्यक्रम सम्पन्न गरेको हो।विद्यालय परिसरमा फुलहरू रोपेर वातावरणीय सौन्दर्य वृद्धि गरिएको विद्यालयले जनाएको छ।

विद्यालयलाई आकर्षक बनाउने उद्देश्यसहित विशेष किसिमका फुलका विरुवाहरु रोपिएको विद्यालयका प्रधानाध्यापक बसन्ती अर्याल ले  जानकारी दिनु भयो। उहाँका अनुसार कार्यक्रम विद्यालयले औपचारिक रूपमा आयोजना गरेको हो।

कार्यक्रमको अध्यक्षता  शिक्षक अभिभावक संघका अध्यक्ष हरिलाल आचार्यले गर्नुभएको थियो। कार्यक्रममा त्रैमासिक परिक्षाको  नतिजा विश्लेषण गरिएको थियो। विगत वर्षहरूको तुलनामा यस वर्ष नतिजामा सुधार देखिएको, विद्यार्थीको बौद्धिक क्षमता र लेखाइमा स्पष्ट प्रगति आएको अभिभावकहरुको प्रतिक्रिया छ।

कार्यक्रममा सहभागी अभिभावक धनकला पाण्डे, पितम्बर गैरे  र जुना परियारले विद्यालयको भौतिक प्रगति, शैक्षिक गुणस्तर तथा व्यवस्थापनमा भएको सुधारले आफूहरूमा सकारात्मक ऊर्जा जागेको र विद्यालयप्रति गर्व महसुस भएको प्रतिक्रिया दिनुभयो।

उता, विद्यालय व्यवस्थापन समितिका अध्यक्ष कमल सुनारले आफू अनुपस्थित भए पनि वृक्षारोपण तथा नतिजा प्रकाशन कार्यक्रम सफलताका साथ सम्पन्न भएकोमा खुशी व्यक्त गर्दै विद्यालयका प्रशासनिक कार्यदेखि शैक्षिक उपलब्धिसम्म सुधार देखिनु विद्यार्थीको क्षमतामा वृद्धि भएको संकेत भएको जानकारी दिनुभयो।